Duitsland se regering het Maandag aangekondig dat die land sy polisie-eenheid teen hommeltuie gaan uitbrei. Dit volg dae nadat ’n onbemande hommeltuig met plofstof na ’n strategies belangrike lughawe gevlieg is.
Berlyn was geskok deur die voorval verlede week toe ’n hommeltuig, luidens berigte so groot soos ’n mikrogolfoond, onskadelik gestel is ná dit naby ’n Oekraïense vragvliegtuig by die Leipzig-Halle-lughawe gevind is. Die lughawe is ’n belangrike spilpunt vir die vervoer van militêre toerusting.
Alexander Dobrindt, minister van binnelandse sake, het die voorval as ’n “hibriede aanvalscenario” beskryf wat moontlik ’n “buitelandse moondheid” behels. Hy beplan nou om die aantal personeel in die federale polisie se teen-hommeltuigeenheid tot 300 te verdubbel.
Die aantal operasionele basisse vir die eenheid sal van vier na agt toeneem, het ’n woordvoerder van die ministerie tydens ’n perskonferensie bygevoeg.
Sy het ook gesê Dobrindt sal volgende week amptelik ’n nuwe navorsingsentrum vir hommeltuigtegnologie open wat aan die Duitse Lug- en Ruimtevaartsentrum verbonde is.
’n Bons, maar geen plof . . .
Volgens die nuusweekblad Die Zeit het die hommeltuig by Leipzig-lughawe van een van die vlerke van die Antonov-vliegtuig weggebons ure voordat ’n lughawewerknemer dit omstreeks middernag ontdek het.
Volgens ’n onbevestigde berig is die rede waarom die lading nie ontplof het nie, steeds onduidelik.
Die lughawe in Oos-Duitsland speel ’n belangrike rol in die vervoer van militêre goedere deur die Duitse gewapende magte en NAVO-bondgenote. Dit dien ook as ’n basis vir Oekraïne se Antonov Airlines.
Duitsland en ander Europese lande het al herhaaldelik opgemerk dat hommeltuie oor sensitiewe gebiede, soos lughawens, militêre basisse en nywerheidsaanlegte, vlieg.
‘Njet, dis haastig uitgedinkte provokasie’
Owerhede in Duitsland, een van Oekraïne se grootste ondersteuners, het gesê hulle vermoed Rusland sit agter baie van die voorvalle as deel van ’n veldtog van sabotasie, spioenasie en disinformasie.
Rusland ontken dat hy agter enige van die voorvalle is.
Die Russiese ambassade het verlede week die Leipzig-voorval as ’n “haastig uitgedinkte provokasie” afgemaak wat “slegs die belange van Kiëf en die militaristiese vleuel van die Europese politieke establishment dien”.