Dit was naelbyt, soos meeste Sewes-uitklopwedstryde is. Maar die Blitsbokke het Argentinië in Spanje 19-7 geklop en sal later vanmiddag in die Valladolid-eindstryd teen Australië te speel.
Sebastiaan Jobb het die Blitsbokke die eerste 5-0-voorsprong gegee voordat Argentinië teruggeveg het met ’n verdoelde drie deur Santiago Vera Feld vir ’n 5-7-telling teen rustyd.
Die Blitsbokke het die voorsprong in die tweede helfte teruggeneem ná ’n briljante sololopie deur Ricardo Duarttee, wat sy eie drie verdoel het vir ’n 12-7-voorsprong.
Ryan Oosthuizen het die oorwinning beklink met ’n drie in die laaste minuut, sodat SA teen Australië in die eindstryd in Spanje sal speel.
Daardie wedstryd vind om 16:26 vanmiddag plaas.
Punte
Blitsbokke
Drieë: Sebastiaan Jobb, Ricardo Duarttee, Ryan Oosthuizen
Doelskoppe: Ricardo Duarttee (2)
Argentinië
Drieë: Santiago Vera Feld
Doelskoppe: Santiago Vera Feld