Vandag in die nuus

Hier is die hoofnuus wat vandag, 14 Julie, gebeur het. Dié artikel bevat die vernaamste nuus wat plaaslik, in die sportwêreld en oorsee plaasgevind het.

Plaaslik

• Die Wes-Kaapse hooggeregshof sal Woensdag en Donderdag pres. Cyril Ramaphosa se aansoek aanhoor om die parlementêre komitee wat sy moontlike vervolging ondersoek, te verbied om voort te gaan.
• Die saak teen Ebrahim Kadwa, hoof van die Valke in Gauteng, wat verband hou met onwettige metale, is tot 2 September uitgestel vir die afhandeling van die polisiedossier.
• Brian Padayachee, van die ondersoekdirektoraat teen korrupsie, het vandag aan die Madlanga-kommissie gesê dat Dumisani Khumalo, hoof van die polisie se misdaadintelligensie-eenheid, sy vriend was en dat hy verras was om hom en genl.maj. Nosipho Madondo, wat hy gementor het, moes arresteer.
• SA se mynbousektor het in Mei momentum verloor nadat produksie met 5,4% op ’n jaargrondslag gedaal het, wat April se groei van 8% omgekeer het.
• Inwoners van River Park in Alexandra het die strate ingevaar en beskuldig City Power daarvan dat die kragverskaffer versuim het om ’n belofte, wat reeds ’n jaar gelede gemaak is, na te kom om die Muhauzana-woonstelle van elektrisiteit te voorsien.
• Bok-breier Rassie Erasmus oor Junior Bok Kai Pratt wat glo verbode middels gebruik het: ‘Teleurgesteld, in ongeloof. Ek bedoel, hy het ’n blink toekoms voor hom. Hy was nie deel van ons groep toe dit gebeur het nie, daarom weet ek nie regtig wat ek kan sê om ’n positiewe draai daaraan te gee nie’.

• Zoeloekoning, Misuzulu kaZwelithini, het Thulasizwe Buthelezi as tradisionele eerste minister van die Zoeloevolk afgedank en Inkosi Phatisizwe Chiliza in sy plek aangestel.
• Nigeriese burgers bly buite hul land se ambassade in Pretoria kamp terwyl hulle steeds wag om gerepatrieer te word en beweer hulle is toegang tot die sending geweier nadat hulle reeds weke lank op die sypaadjie deurbring.
• Die saak teen Feroz Khan, adjunkhoof van misdaadintelligensie, en die Gautengse hoof van die Valke, Ebrahim Kadwa, sal na verwagting weer in die landdroshof in Kempton Park voorkom.
• Die Openbare Beleggingskorporasie het sy uitvoerende hoof, Patrick Dlamini, en sy hoofrisikobeampte, August van Heerden, geskors nadat ’n fluitjieblaser-verslag wat in Junie bekend gemaak is, Dlamini van onetiese optrede beskuldig het.
• ’n Skietvoorval in Groendal, Franschhoek, het glo oor 2 tonele in Sunflowerstraat en Upper Leestraat afgespeel waarin vier mense geskiet is en een op die toneel oorlede is.
• Minister van openbare werke, Dean Macpherson, en die eThekwini-burgemeester, Cyril Xaba, besoek die toneel van die gebou wat in Inanda ineengestort het.
• Britse owerhede het bevestig dat drie slagoffers in die Ndodana Tshuma-moordsaak in Bedfordshire met ’n voorwerp doodgeslaan is.

Oorsee

• Meer landsburgers is in Junie in Oekraïne dood as in enige ander maand sedert April 2022, het die Verenigde Nasies gesê, terwyl Rusland sy langafstandmissielaanvalle verskerp het.
• Honderde Franse brandbestryders, bygestaan deur waterbomwerpers, het veldbrande in die gewilde Fontainebleau-woud buite Parys bestry terwyl nóg ‘n versengende hittegolf die Franse hoofstad tref.
• Die Wêreldgesondheidsorganisasie sê die ware omvang van die dodelike Ebola-uitbreking in die DRK kan tot 4 keer groter wees as wat die amptelike syfers aandui.
• Oliepryse het skerp gestyg nadat die VSA ’n nuwe reeks aanvalle op Iran uitgevoer het en pres. Donald Trump belowe het om weer ’n vlootblokkade in te stel.
• Rusland het beskuldigings deur die Europese Unie en Brittanje dat die Russiese intelligensiediens agter ’n kuberaanvalveldtog in Europa sit, as ‘ongegrond’ verwerp.
• Iranse staatstelevisie het Dinsdag berig dat 5 ontploffings naby die hawestad Bandar Abbas, aan die Straat van Hormoes, gehoor is, soos hernude konflik tussen Iran en die VSA plaasvind.
• ’n 68-jarige man van Berlyn is aangekla daarvan dat hy 14 vroue verdoof, verkrag en die seksuele aanrandings verfilm het.
• Die dodetal ná die verwoestende brand by ’n kroeg in Bangkok het tot 30 gestyg, terwyl bedroefde familielede Dinsdag die liggame van hul geliefdes uitgeken het en ander steeds na vermiste familielede gesoek het.

• Iran se parlement het begin werk aan ‘n wetsontwerp oor die Straat van Hormoes, het die voorsitter van die parlement se veiligheidskomitee gesê, terwyl spanning tussen Washington en Teheran oor die strategiese seestraat toegeneem het.
• Die VSA het vir ’n 3de opeenvolgende nag lugaanvalle op Iran uitgevoer terwyl pres. Donald Trump beplan om vandag weer ’n blokkade op Iranse hawens in te stel en ’n heffing van 20% op vragvervoer deur die strategiese Straat van Hormoes oorweeg.