Die gewese prokureur Peet Viljoen wat hom nou aan die verkeerde kant van die gereg bevind, word deur 400 klagtes, waaronder bedrog en korrupsie ten bedrae van nagenoeg R27 miljoen, in die gesig gestaar. Sy aansoek om borgtog is geweier en die saak is tot 8 Julie uitgestel. Buiten die lys van klagtes is daar ook die supermark-situasie in Amerika wat daartoe gelei het dat hy en sy The Real Housewives of Pretoria-vrou, Mel, in hegtenis geneem sal word sou hulle ooit weer na Amerika wou terugkeer.
Peet en Mel se verklaring
Aan almal wat ons seergemaak het,
Hierdie is een van die moeilikste boodskappe wat ons nog ooit moes skryf.
Die afgelope paar weke het ons op maniere verander wat ons nooit verwag het nie. Deur alles wat gebeur het, het God werklik aan my en Peet gewerk. Hy het ons nederig gemaak, ons tereggewys en vir ons gewys waar ons verkeerd was.
Ons wil iets sê wat lankal gesê moes gewees het.
Aan elkeen wat ons met ons woorde, ons video’s of ons optrede seergemaak het… ons is opreg jammer.
Ons het dinge gesê wat ons nie moes gesê het nie. Ons het gereageer wanneer ons eerder moes geluister het. Partykeer het ons uit woede of frustrasie gepraat eerder as uit liefde, en ons besef dat sommige van ons woorde mense seergemaak het.
Ons kan dit nie terugneem nie. Ons kan nie die verlede verander nie. Maar ons kan verantwoordelikheid daarvoor aanvaar.
God het vir ons gewys dat dit nie naastenby so belangrik is om reg te wees as om liefde, vriendelikheid en genade te betoon nie. Dit is iets wat ons steeds elke dag leer.
Niemand het ons gevra om hierdie boodskap te skryf nie. Ons doen dit omdat dit op ons harte lê en omdat ons weet dat om jammer te sê net die eerste stap is. Die ware verskoning lê daarin om anders te leef, en dit is waartoe ons ons verbind.
As ons jou seergemaak, te na gekom of teleurgestel het, weet asseblief dat ons opreg jammer is.
Ons besef ook dat vergifnis nie iets is waarop ons kan aanspraak maak of wat ons kan verwag nie. Dit is jou keuse, en ons sal dit respekteer, ongeag wat jy besluit.
Al waarvoor ons vra, is dat jy ons die geleentheid sal gee om deur die manier waarop ons voortaan leef te wys dat God werklik ons harte verander het.
Baie dankie aan elkeen wat vir ons gebid het, ons ondersteun het en ons daaraan herinner het dat niemand van ons buite God se genade is nie.
Mag God julle almal seën.
Liefde,
Mel & Peet
Tammy Taylor-ondersoek
Die Valke se Johannesburg-eenheid vir ondersoeke na ernstige kommersiële misdaad het ondersoeke na drie bedrogsake wat met die Tammy Taylor SA-franchise verband hou, afgehandel.
Luitenant-kolonel Granville Meyer, woordvoerder van die Valke, het op 23 Junie vanjaar gesê die sake hou verband met klagtes wat in 2022 by die polisie aanhangig gemaak is.
“Die ondersoekdossiere is nou by die Nasionale Vervolgingsgesag vir ’n besluit oor of vervolging ingestel moet word.”
Die egpaar het deur die jare volgehou dat hulle ’n wettige en regmatige onderneming bedryf.