’n Oortuigende bonuspunt-sege oor Benetton was dit wel, maar die Bulls sal die klein jakkalsies wil uitskakel as hulle ver in die uitkloprondes wil vorder.
Die eindtelling van 45-19 het vir hulle ’n volle vyf punte op die puntelys verskaf, maar Benetton het die tuisspan deurlopend laat sweet.
Wat opvallend was, is dat die Bulls se eerste twee drieë nie deur ’n speler se indrukwekkende vonk van briljantheid veroorsaak is nie. Beide is gedruk ná die bal deur talle hande van spelers van alle groottes gestuur is, met die hele span wat soos ’n goed-geoliede masjien sing.
Die Bulls het aanvanklik net drie van hul eerste nege wedstryde hierdie seisoen gewen, maar met hul jongste sege oor Benetton, het hulle nou altesaam 12 van 18 wedstryde gewen.
Hulle het dus ses wedstryde in daardie eerste nege wedstryde verloor, maar kon hul seisoen in dramatiese wyse daarna red. Dié span gaan net van krag tot krag en sal die meeste van hul tyd in die uitkloprondes wil maak.
Hoewel hulle in drie uit die laaste vier eindstryde van die Verenigde Rugbykampioenskap gespeel het, kon hulle nie een van dié wedstryde wen nie. Sedertdien is voormalige Springbok-afrigter Jake White in die pad gesteek en het Johan Ackermann hierdie seisoen by hom oorgeneem.
Tog was alles nie maanskyn en rosegeur nie. Die eerste kwart van die wedstryd het die Bulls byna al die momentum geniet. Daarna het Benetton daardie einste momentum in hul guns teruggestoei, maar steeds twee drieë afgestaan.
Bulls-flank Jeandré Rudolph het as die speler van die wedstryd weggestap.
Die Bulls het ’n goeie trop spelers en sal heel moontlik goed vaar in die uitkloprondes. Maar sal hulle dit al die pad tot by die eindstryd maak . . . en eindelik wen?