Die Verenigde Rugbykampioenskap-eindstryd tussen Leinster en die Bulls beloof om ’n kragmeting van formaat te wees.
Leinster, die verdedigende kampioen, is op eie bodem ’n formidabele teenstander, maar die Bulls, wat op die regte tyd hul beste rugby speel, beskik oor net die regte pyle in hul koker om eindelik die beker te lig.
Leinster-afrigter, Leo Cullen, het dié gevaar erken en gesê die Bulls se oorwinning oor Glasgow Warriors in die halfeindstryd wys hulle vrees nie wegwedstryde nie.
Hier is vyf gebiede wat waarskynlik Vrydagaand om 20:30 SA tyd die verskil sal maak:
Skrumoorheersing
Die Bulls sal hulself op die skrums wil laat geld. Die Springbokke se oorheersing van Ierland se voorspelers verlede November wys wat moontlik is.
Met ’n sterk voorry en Wilco Louw wat van die bank af kan kom, behoort die Bulls die voordeel in dié afdeling te hê. As dit gebeur, sal Handré Pollard se skopskoen hulle help om druk in punte of gebiedsvoordeel te omskep.
Die nr. 9-stryd
Jamison Gibson-Park beheer Leinster se spel uitstekend vanaf skrumskakel. Hy weet presies wanneer om die bal te versprei, te skop of self aan te val.
Aan die Bulls se kant geniet Embrose Papier ’n uitstekende seisoen. Sy vinnige diens, gevaarlike skopwerk en spoed maak hom ’n groot bedreiging.
Om Leinster se vinnige begin te stuit
Leinster hou daarvan om vroeg punte aan te teken en teenstanders onder druk te plaas.
Verlede jaar het hulle met ’n voorsprong van 19-0 teen die Bulls weggetrek voordat hulle uiteindelik met 32-7 gewen het.
Bulls-afrigter, Johan Ackermann, weet sy span moet die eerste 20 minute oorleef.
“Dit is een statistiek wat uitstaan. Hulle teken baie punte in die eerste 20 minute aan, so ons is bewus daarvan,” het hy gesê.
Leinster se aanval teen die Bulls se verdediging
Leinster beskik oor een van die mees gevaarlike aanvalstrukture in klubrugby. Hulle hou die bal lewendig en val in vlae aan.
Die Bulls se verdediging was soms wisselvallig hierdie seisoen. Teen Glasgow het hulle drie drieë in die eerste 25 minute afgestaan voordat hulle sake reggeruk het.
Dissipline
Selfs die beste wedstrydplan beteken min sonder dissipline.
Leinster is meesters daarin om goedkoop strafskoppe af te dwing, veral by afbreekpunte en naby die teenstander se doellyn.
As die Bulls ongedissiplineerd is, gaan hulle sukkel om te wen.
Teen ongeveer 22:30 Vrydagaand sal dit duidelik wees wie as kampioen gekroon word. Vanuit ’n Suid-Afrikaanse oogpunt sal die hoop wees dat die Bulls uiteindelik hul eerste VRK-titel én die beker huis toe kan bring.