Vyf lede van dieselfde familie is op 20 Augustus in die Gqeberha Gespesialiseerde Handelsmisdaadhof gevonnis nadat hulle die Departement van Indiensneming en Arbeid na bewering met sowat R500 000 bedrieg het deur middel van ’n bedrieglike werkloosheidsversekeringsfonds- (WVF-) eiseskema wat byna twee jaar lank bedryf is.
Volgens die Valke se woordvoerder, lasbriefbeampte Ndiphiwe Mhlakuvana, bring die skuldigbevindings en vonnisse ’n einde aan meer as ’n dekade se regsgedinge wat uit die skema gespruit het. Dit het 18 bedrieglike WVF-eise en die vervalsing van amptelike dokumente behels om geld na bankrekeninge onder die beskuldigdes se beheer te kanaliseer.
Hy het gesê die vyf – Dimitri Jantjies (48), Barbara Jantjies (77), Thomas Jantjies (77), Virsinese Jantjies (42) en Tania Jantjies (49) – is aan bedrog en 13 aanklagte van geldwassery skuldig bevind.
Mhlakuvana het gesê die beskuldigdes het saam met die ontslape C’Bornai Jantjies (50), ’n voormalige werknemer van die departement, opgetree en bedrieglike WVF-aansoeke ingedien.
“Die skema, wat van Mei 2009 tot Maart 2011 bedryf is, het die vervalsing van amptelike dokumente, insluitend werkgewersverklaringsvorms (UI-19’s), behels om WVF-geld na bankrekeninge onder die beskuldigdes se beheer te kanaliseer,” het Mhlakuvana gesê.
Hy het gesê nadat die departement waarskuwingstekens opgemerk het, is die saak na die Valke verwys vir ’n intensiewe ondersoek.
Dimitri is tot 12 jaar gevangenisstraf gevonnis, terwyl Barbara en Thomas elk tot vyf jaar gevangenisstraf gevonnis is.
Virsinese en Tania is elk tot vier jaar gevangenisstraf gevonnis.