Dit was ’n brose skietstilstand van die begin af. Nié Iran óf die VSA kon werklik hul sin kry in onlangse onderhandelings nie, en beide lande het die lyn talle kere oorgesteek sedert die skietstilstand van twee weke van 8 April af in werking getree het.
Die nuutste kinkel in die kabel het Sondag plaasgevind toe die VSA ’n Iranse vragskip in die Golf van Oman in beslag geneem het. Dit het Iran genoop om met hommeltuigaanvalle te reageer en oliepryse te laat styg.
VSA-pres. Donald Trump het gesê die USS Spruance het op die Touska-vragskip geskiet en dit in beslag geneem soos Amerikaanse vlootsoldate aan boord ondersoek ingestel het.
Iran het met hommeltuie in die rigting van Amerikaanse militêre skepe gereageer ná die beslaglegging, het die Tasnim-nuusagentskap berig.
Die voorval kom te midde van ’n stryd tussen Washington en Teheran oor beheer van die Straat van Hormoes, ’n belangrike deurgang vir die wêreld se olie en vloeibare aardgas, wat vir weke feitlik gesluit was onder druk van die Islamitiese republiek.
Teheran het die straat Vrydag kortliks heropen in erkenning van die Israel-Hezbollah-skietstilstand in Libanon, maar dit weer Saterdag gesluit in reaksie op die voortgesette Amerikaanse blokkade van skepe wat na en van Iranse hawens reis.
Oliepryse het Maandag skerp gestyg te wyte aan die vyandelikhede nadat Iran die Straat van Hormoes oor die naweek gesluit het, net ’n dag nadat dit heropen is.
Tog het voortgesette hoop op ’n ooreenkoms om die sewe weke lange krisis te beëindig, aandelemarkte ondersteun, selfs terwyl Teheran gesê het hy beplan nie tans om vredesgesprekke by te woon nie.
LEES | Oil plunges, stocks jump as Iran declares Strait of Hormuz open
Iranse staatsmedia het Sondag berig dat Teheran nie van plan is om deel te neem aan gesprekke met die Verenigde State nie, ure nadat Trump gesê het hy stuur onderhandelaars na Islamabad. “Daar is tans geen planne om deel te neem aan die volgende ronde van Iran-VS-gesprekke nie,” het die staatsuitsaaier IRIB gesê, met verwysing na Iranse bronne.
Trump het gesê Amerikaanse onderhandelaars sal Maandag in Pakistan wees om gesprekke te hervat oor die beëindiging van die oorlog met Iran, terwyl hy weer gedreig het om sy kragstasies en brûe te vernietig indien geen ooreenkoms bereik word nie.
Trump het nie gesê wie die afvaardiging sal lei nie, maar ’n Withuis-amptenaar het gesê dit is adjunkpresident ,JD Vance, wat die vorige ronde gesprek gelei het, toe daar nie ’n ooreenkoms bereik kon word nie.