Cilliers Brink, die DA se Tshwane-burgemeesterskandidaat, het Vrydag sy verkiesingsveldtog amptelik afgeskop met ’n direkte en onverskonende boodskap: die administratiewe hoofstad werk nie, en dit móét reggeruk word.
Brink het ’n vyfjaarplan by die Mamelodi-Wes-gemeenskapsentrum uiteengesit wat fokus op dienslewering, veiligheid en aanspreeklikheid.
“Om Tshwane weer te laat werk, sal die DA vyf beloftes in vyf jaar lewer,” het hy gesê, en daarmee ’n duidelike, meetbare raamwerk aan kiesers voorgehou.
Die eerste belofte spreek ’n kernkwessie aan wat al jare lank die stad teister: korrupsie.
Brink was onomwonde: “Ons sal korrupte amptenare en tenderpreneurs afdank en eerlike, hardwerkende professionele mense aanstel,” het hy Vrydag gesê.
Dit is ’n boodskap wat waarskynlik aanklank sal vind by inwoners wat moeg is vir diensleweringsmislukkings wat dikwels aan wanbestuur gekoppel word.
LEES OOK | Tshwane se waterprobleme deur Rietvleidam-besoedeling vererger, sê DA
Op die gebied van veiligheid belowe Brink ’n tegnologiese aanslag. “Ons sal wet en orde herstel deur misdaadbestrydingstegnologie soos hommeltuie, CCTV-kameras en ’n metro-polisiebeheerkamer te ontplooi.”
Nog ’n fokus is infrastruktuur – iets wat in Tshwane toenemend onder druk is.
Brink het belowe dat die stad se elektrisiteit, water, paaie en straatligte opgegradeer sal word, onder meer deur vennootskappe met die private sektor. Dit is ’n benadering wat dikwels kritiek lok, maar ook gesien word as ’n moontlike oplossing vir finansieel sukkelende munisipaliteite.
Ekonomiese groei vorm die kern van sy vierde belofte.
Volgens Brink sal bates soos munisipale kragstasies, die varsproduktemark en Wonderboom-lughawe beter benut word “om belegging te lok en werksgeleenthede te skep”.
Hy het die rol en samewerking van gemeenskappe beklemtoon.
“Ons sal saam met goed georganiseerde plaaslike gemeenskappe werk om woonbuurte skoon en veilig te maak.”