Die bek-en-klouseerkrisis in die Vrystaat toon geen tekens van afname nie nadat die provinsiale departement van landbou, landelike ontwikkeling en omgewingsake nog 12 nuwe gevalle bevestig het, wat die getal aangemelde gevalle op 620 te staan bring.
Die jongste uitbrekings is in die omgewings van Warden, Sasolburg, Bloemfontein en Kroonstad aangemeld en plaas verdere druk op ‘n veebedryf wat reeds maande lank teen die verspreiding van die hoogs aansteeklike siekte veg.
Veeartsenydienste het intussen hul kommer uitgespreek oor berigte dat sommige produsente steeds versuim om gevalle aan te meld. Volgens die departement skep die optrede nie net ‘n verwronge beeld van die werklike omvang van die uitbreking nie, maar bemoeilik dit ook die beplanning van beheermaatreëls en die verspreiding van entstowwe.
Boere, wees bedag
Boere word opnuut versoek om diere wat tekens van oormatige speekselvloei, mondletsels of mankheid toon onmiddellik by hul naaste staatsveearts of dieregesondheidstegnikus aan te meld. Die departement herinner veeboere ook aan hul wetlike verpligtinge ingevolge die Wet op Dieresiektes. Alle diere-eienaars moet redelike stappe doen om die verspreiding van beheerde siektes te voorkom en streng biosekuriteitsmaatreëls toe te pas.
So sien dit nou daaruit
Kroonstad bly die episentrum van die uitbreking, met 117 bevestigde gevalle; gevolg deur Heilbron met 93, Frankfort met 74, Bethlehem met 67 en Sasolburg met 64 gevalle as die gebiede met die hoogste syfers.
- Ladybrand – 46 gevalle;
- Warden – 43 gevalle;
- Welkom – 43 gevalle;
- Qwaqwa – 29 gevalle;
- Bultfontein – 12 gevalle;
- Boshof – 10 gevalle;
- Fauresmith – 8 gevalle;
- Smithfield – 7 gevalle;
- Bloemfontein – 5 gevalle; en
- Thaba Nchu – 2 gevalle
Waar om aan te meld
- Staatsveeartse: Vind jou naaste kantoor via die Departement van Landbou, Grondhervorming en Landelike Ontwikkeling of die RMIS-siektevoorvalportaal.
- Veevervoer (Wes-Kaap): Alle vervoer van vee moet aanlyn geregistreer word deur die Wes-Kaapse Dierebewegingsaansoek te gebruik om risiko’s beter op te spoor en te beheer.
- Nasionale departement se kontakbesonderhede: Jy kan ook die Departement se skakelbord kontak by 012 312 8911 of 012 319 6000.