Springbok-agterspelers Cheslin Kolbe en Damian Willemse sal hul 50ste verskyning in die Bok-trui vier wanneer hulle vir die openingstoets van die seisoen teen Engeland in die Nasieskampioenskap op die veld draf. Die twee het ook agt jaar gelede hul internasionale debuut gemaak.
Erasmus gaan op beproefde kombinasies staat maak vir die kragmeting, met flank Siya Kolisi wat Suid-Afrika vir die 72ste keer in ’n toets aanvoer. Dié wedstryd is die eerste ontmoeting tussen die spanne op Ellis Park sedert 2018, wat terloops ook Kolisi se eerste toets as kaptein was.
Die bekende beginspan word deur ’n opwindende plaasvervangersbank ondersteun.
Twee spelers in die pak, Kolisi en Eben Etzebeth, is toets- “centurions”. Die res van die los trio bestaan uit Jasper Wiese en Pieter-Steph du Toit, terwyl Ruan Nortje in die tweede ry benoem is.
Die 2025 Wêreldrugby- en SA Rugby Mansspeler van die Jaar, Malcolm Marx (haker), sak tussen die ervare stutte Ox Nche en Thomas du Toit.
Kurt-Lee Arendse (vleuel) voltooi die agterste drie met Kolbe en Willemse, terwyl Jesse Kriel en Damian de Allende die middeveld vorm met Manie Libbok en Grant Williams as die skakelpaar.
Erasmus het ’n verdeling van vyf voorspelers en drie agterspelers op die bank gekies met Jan-Hendrik Wessels, Gerhard Steenekamp en Zach Porthen vir die voorry. Marco van Staden en Cameron Hanekom, wat albei vir die eerste keer sedert November 2024 terug is in die groep, voltooi die groep voorspelers.
Die drie agterspelers op die bank is Cobus Reinach, Andre Esterhuizen en Canan Moodie.
Erasmus het bevestig dat Franco Mostert (veelsydige voorspeler) en Lood de Jager (slot) nie vir keuring beskikbaar is nie weens klein beserings en siekte, terwyl Riley Norton vrygestel is as gevolg van ’n besering. Ethan Hooker sluit Maandag weer by die span in Johannesburg aan nadat hy herstel het van ’n skouerbesering wat hom sedert April uit aksie gehou het.
“Engeland is ’n sterk span, en ons verwag dat hulle alles in hierdie wedstryd sal gee,” het Erasmus gesê. “Dit was belangrik om ’n groep te kies met ’n kombinasie van ervaring en jong spelers wat gewys het hulle kan op hierdie vlak presteer.
“Die spelers het hard geoefen en weet wat nodig is om teen hierdie kaliber span te speel. Ons hoop hulle kan dit op die veld oordra.
“Hierdie naweek gaan ’n heel ander uitdaging wees in vergelyking met die Barbarians- en Zimbabwe-wedstryde. Engeland is ’n gevestigde span wat uit ’n Sesnasies-reeks kom, en soos ons wil hulle ook goed begin in hierdie nuwe kompetisie. Ons verwag ’n fisieke stryd.”
Erasmus was ook verheug oor Kolbe en Willemse se mylpaal:
“Hulle is albei jare lank steunpilare vir ons. As span wil ons dit vir hulle ’n spesiale dag maak. Dit gebeur nie elke dag dat twee spelers hul 50ste toets haal nie, en dit gee ons beslis ekstra motivering.”
Die toets begin om 17:40 en word regstreeks op SuperSport uitgesaai. Die eerste wedstryd van die dubbelprogram sien hoe die Springbok Vroue om 13:30 teen die VSA te staan kom.
Springbokspan teen Engeland (Johannesburg)
Begin XV:
15 Damian Willemse
14 Cheslin Kolbe
13 Jesse Kriel
12 Damian de Allende
11 Kurt-Lee Arendse
10 Manie Libbok
9 Grant Williams
8 Jasper Wiese
7 Pieter-Steph du Toit
6 Siya Kolisi (kaptein)
5 Ruan Nortje
4 Eben Etzebeth
3 Thomas du Toit
2 Malcolm Marx
1 Ox Nche
Plaasvervangers:
16 Jan-Hendrik Wessels
17 Gerhard Steenekamp
18 Zach Porthen
19 Marco van Staden
20 Cameron Hanekom
21 Cobus Reinach
22 Andre Esterhuizen
23 Canan Moodie
Kitsfeite
- Cheslin Kolbe en Damian Willemse sal albei hul 50ste toetskappe vir Suid-Afrika behaal.
- Willemse se eerste toets was op 8 Augustus 2018, op die ouderdom van 20, toe hy as plaasvervanger teen Argentinië in Durban op die veld gekom het.
- Kolbe het sy toetsdebuut van die bank af teen Australië in Brisbane op 8 September 2018 gemaak en die eerste van sy 21 toetsdrieë ’n week later teen Nieu-Seeland in Wellington gedruk.
- Cobus Reinach benodig nog net vyf toetspunte om die 100-punt mylpaal in die groen-en-goud te bereik.
- Eben Etzebeth sal sy Springbok-rekord as die speler met die meeste toetse uitbrei tot 142 toetse agter sy naam.
- Damian de Allende benodig nog net twee toetsverskynings ná hierdie naweek om by die eksklusiewe groep spelers aan te sluit wat die 100-toets-merk bereik het.
- Pieter-Steph du Toit benodig nog vier toetsverskynings ná hierdie wedstryd om sy 100ste toets te behaal.
- Ox Nche sal nog twee toetse nodig hê om by Willemse en Kolbe op 50-tal aan te sluit.
- Die Springbokke het drie van die vier wedstryde wat hulle sedert 1972 teen Engeland in Johannesburg gespeel het, gewen, met hul laaste nederlaag teen die Engelse wat in daardie jaar op Ellis Park plaasgevind het.
- Hierdie wedstryd sal die eerste keer wees dat die Springbokke Engeland ontmoet sedert die 2024 Castle Lager Uitgaande Toer – ’n wedstryd wat die Bokke 29–20 gewen het.