Die Papier het ’n suksesvolle stigtingtingsfase agter die rug waarin teikens behaal en oortref is, het Barnard Beukman, redakteur van die koerant, by die Innibos Kunstefees in Mbombela gesê.
Volgens hom word die vestigingsfase nou binnegegaan, wat harde werk gaan wees, maar momentum word gekry van lesers en adverteerders. Hy was by die ATKV-Boeke-oase in gesprek met Izak du Plessis van Nuuspod.
Voor ’n vol gesprekslokaal het hy gesê die gedrukte koerant bly ’n belangrike skakel in enige media-aanbod, want daar is steeds ’n belangrike deel van die lesersgemeenskap wat ook die ontledende uiteensettings van hul aktuele omgewing soek. Die groot verrassing is die betrokkenheid van jonger lesers, veral die in hul dertigs, aan die diskoers in die koerant.
Die gedrukte koerant is net een aspek van Die Papier se handelsmerk. Die Papier Praat op YouTube Donderdagaande om 19:00 en die webwerf is van die inisiatiewe wat die volle media-aanbod begin lewer.
- Huisaflewering is ook beskikbaar deur On the Dot te e-pos by diepapierintekening@onthedot.co.za of te bel by 087 353 2191.
- ’n Elektroniese koerant kan ook gekoop word by op diepapier.co.za of by Magzter.