Die Demokratiese Alliansie (DA) het Vrydag, 10 Julie, die druk op pres. Cyril Ramaphosa verhoog om ’n permanente minister van polisie aan te stel. Dit volg ná ’n massaprotesaksie teen geweldmisdaad in Nelson Mandelabaai.
Geordin Hill-Lewis, die DA-leier, het duisende betogers in ’n optog van Gelvan Park na die SAPD 10111-sentrum in Schauderville gelei. Die optog val saam met die eenjaar-mylpaal sedert prof. Firoz Cachalia as waarnemende mininster aangestel is.
Miljoene vermors op geskorste minister
Hill-Lewis het kritiek gelewer op die feit dat Suid-Afrikaners tans vir “twee ministers” betaal. Volgens hom sit die geskorste minister steeds by die huis terwyl hy ’n salaris van meer as R2,6 miljoen per jaar ontvang.
“Hierdie geld is genoeg om agt voltydse speurders aan te stel wat kan help om misdadigers agter tralies te kry,” het Hill-Lewis gesê. Hy voer aan dat die land nie onsekerheid in die polisie-leierskap kan bekostig terwyl moord, afpersing en bendegeweld die ekonomie en gemeenskappe verwoes nie.
Die DA se driepuntplan
Hill-Lewis het die DA se strategie vir die herstel van die strafregstelsel in drie punte opgedeel:
- Herbou misdaadintelligensie en versterk sigbare polisiëring om misdadigers vas te trek.
- Verbeter forensiese kapasiteit en sorg vir volledige, werkende dossiere sodat vervolgings slaag.
- Stryd teen korrupsie binne die SAPD self om die stelsel te suiwer.