Wallis het hul span aangekondig wat Saterdag in Durban teen die Springbokke te staan kom, met ses veranderinge aan die span wat 35-21 teen Argentinië verloor het.
Een van dié veranderinge is die terugkeer van Louis Rees-Zammit op vleuel vir Wallis.
Die span se hoofafrigter, Steven Tandy, het Teddy Williams sy toetsdebuut op slot gegee, terwyl die losvoorspelers Alex Mann en Jac Morgan op flank begin, met Aaron Wainwright op agsteman.
Tomos Williams begin op skrumskakel, terwyl Dan Edwards op losskakel uitdraf.
Max Llewellyn maak ook sy eerste verskyning in die Nasieskampioenskap op buitesenter.
“Ons het ’n paar veranderinge aan die beginspan gemaak. Dit is die einde van die seisoen en ons het baie gereis,” het Tandy gesê toe hy sy span aangekondig het.
“Sommige spelers verdien ’n geleentheid, en dit is ’n kans om die span te verfris.
“Vir ons gaan dit daaroor om ons spel uit te leef. Ons wil ’n ware fisieke aanslag toon.
“Ons kom te staan teen waarskynlik die mees fisieke span in die wêreld. Ons weet dus ons sal ons fisieke spel na ’n hoër vlak moet neem.
“Dit is ’n uitstekende geleentheid om onsself teen die beste span ter wêreld te toets.”