Codie Taylor het erken hy het dit gemis om sedert die einde van Super Rugby deur Suid-Afrika te toer en sê die provinsiale wedstryde in die middel van die week tydens die Greatest Rivalry-toer gee hom weer die geleentheid om teen ’n spelstyl te speel wat hy opreg geniet.
Die All Black-haker het tydens ’n verwelkomingsgeleentheid by Kaapstad-stadion openhartig vertel wat verlore gegaan het sedert Nieu-Seeland en Suid-Afrikaanse rugbyunies nie meer gereeld in Super Rugby teen mekaar speel nie.
“Om eerlik te wees, dit is jammer dat ons nie meer hierheen kom vir Super Rugby nie. Ek het altyd hierdie toere geniet en die uitdagings teen al die klubs. Dis ’n ander soort rugby as wat ons tuis speel,” het Taylor gesê.
Hy het verduidelik wat Suid-Afrikaanse provinsiale rugby so ’n unieke uitdaging vir enige besoekende span maak.
“Groot, fisieke manne, uitstekende vaste fasette, maar ook agterspelers wat jou in ’n oogwink kan straf. Ek sien regtig daarna uit om weer teen hierdie spanne te speel. Dit was te lanklaas.”
Taylor het ook teruggedink aan sy laaste wedstryd teen ’n Suid-Afrikaanse klubspan, toe hy die Stormers in 2019 aangedurf het – ’n wedstryd wat duidelik ’n blywende indruk op hom gemaak het.
“Ek het teruggedink aan 2019 toe ons hier teen die Stormers gespeel het. Wat ’n wedstryd was dit nie – ons het gelykop gespeel. Die mededingendheid is altyd daar, al speel ons nie meer gereeld teen mekaar nie.”