Die Sharks en Bulls het Vrydag as wenners uit hul onderskeie voorseisoense vriendskaplike wedstryde teen die Lions en Stormers getree.
Die Sharks het ’n 33-31-oorwinning teen die Lions op Ellispark behaal, terwyl die Bulls in Paarl met 38-26 gewen het nadat hulle rustyd reeds met 17-12 voorgeloop het.
Dit was waardevolle wedstrydtyd vir al die Suid-Afrikaanse franchises voor die Verenigde Rugbykampioenskap (VRK) oor twee naweke afskop. Die Stormers speel weg teen Connacht, terwyl die Bulls na Italië reis om Zebre te pak.
Tuis speel die Lions teen Leinster en die Sharks sal in Durban teen die Ospreys kragte meet.
Die groot gesprekspunt in Paarl was die nuwe Stormers-blits Lleyton Davids, wat ’n skitterende drie gedruk het. Hy het sy onmiskenbare spoed ten toon gestel toe hy verby die nuwe Bulls-aanwins Thaakir Abrahams gebreek het en die dekkingsverdediging agtergelaat het gedurende die eerste helfte.
LEES | Viral speedster Leyton Davids earns Stormers pre-season shot against Bulls
Stormers-afrigter John Dobson het ná die wedstryd ook bevestig dat Springbok-vleuel Cheslin Kolbe, wat sy kakebeen in die derde toets van die Greatest Rivalry-reeks teen die All Blacks gebreek het, vir ongeveer agt weke buite aksie sal wees.
“Hy is vir agt weke uit,” het Dobson ná die wedstryd gesê.
“Hy sou deur daardie hele [VRK]-Oktober-reeks gespeel het, al vier wedstryde. Dit is ’n geweldige terugslag,” het hy bygevoeg.
Bulls-afrigter Johan Ackermann was tevrede met wat hy in Paarl gesien het.
“Ek het net vir Dobbo gesê dit was perfek in terme van wat ons van die spelers wou sien,” het Ackermann gesê.
“Daar was foute wat ons weet ons moet regstel, maar die groot pluspunt is dat daar geen beserings was nie.
“Daar was goeie oomblikke, en ons is tevrede daarmee,” het Ackermann bygevoeg.