Springbok-legende Bakkies Botha sê die komende Rugby’s Greatest Rivalry-toer, waartydens Suid-Afrika en Nieu-Seeland mekaar in vier toetswedstryde pak, verteenwoordig die hoogtepunt van rugby vir Suid-Afrikaners.
Die toer, wat vroeg in Augustus afskop, sal ook sien hoe die All Blacks Suid-Afrika se vier Verenigde Rugbykampioenskap (VRK)-franchises aandurf tydens hul eerste uitgebreide toer na die land in 30 jaar.
Botha, wat tussen 2002 en 2014 in 85 toetse vir die Springbokke uitgedraf het, het vroeër vandeesmaand tydens die bekendstelling van die reeks gesê daar is niks soos ‘n kragmeting tussen die Springbokke en die All Blacks nie.
“Ek dink hierdie wedstryd is iets waarmee jy grootword. Wanneer jy met enige jong speler praat, en ook vir my toe ek begin toetsrugby kyk het, was dit die All Blacks teen die Springbokke wat uitgestaan het,” het hy gesê.
“Dit gaan eintlik oor die ryke geskiedenis tussen die twee spanne, en dit is wat alles bymekaarbring.
“Ek besef hoe passievol Suid-Afrikaners oor Springbokrugby is, en ‘n wedstryd tussen die Springbokke en die All Blacks is eenvoudig op ‘n ander vlak.”
Botha glo die toer sal nie net ‘n groot gebeurtenis vir Suid-Afrika wees nie, maar ook die aandag van rugbyondersteuners wêreldwyd trek.
“Ek glo hierdie Rugby’s Greatest Rivalry-toer na Suid-Afrika gaan geweldig groot wees – vir die land én vir die spel van rugby.”
Wedstryde: Rugby’s Greatest Rivalry-toer
- Vrydag, 7 Augustus: Stormers – Kaapstad
- Dinsdag, 11 Augustus: Sharks – Durban
- Saterdag, 15 Augustus: Bulls – Pretoria
- Saterdag, 22 Augustus: Springbokke teen All Blacks – Eerste toets, Johannesburg
- Dinsdag, 25 Augustus: Lions – Johannesburg
- Saterdag, 29 Augustus: Springbokke teen All Blacks – Tweede toets, Kaapstad
- Saterdag, 5 September: Springbokke teen All Blacks – Derde toets, Johannesburg
- Saterdag, 12 September: Springbokke teen All Blacks – Vierde toets, Baltimore, Verenigde State van Amerika