Springbok-afrigter Rassie Erasmus en SA ‘A’-afrigter Mzwandile Stick het sterk spanne vir hul openingswedstryde van die seisoen teen die Barbarians en Zimbabwe Saterdag in Gqeberha aangekondig. Die spanne sal onderskeidelik deur Siya Kolisi en Vincent Tshituka aangevoer word.
Die SA ‘A’-span speel Saterdag om 12:00 teen Zimbabwe in die Nelson Mandelabaai-stadion, waarna die Springbokke om 15:00 teen die Barbarians te staan kom. Albei wedstryde word regstreeks op SuperSport uitgesaai.
Beide spanne bevat ’n goeie balans tussen ervare internasionale spelers en talentvolle nuwelinge wat hierdie seisoen sterk aanspraak gemaak het op hul insluiting vir die groen en goud. ’n Aantal Junior Bokke, wat Suid-Afrika by die Junior Wêreldkampioenskap in Georgië gaan verteenwoordig, kry ook hul eerste blootstelling aan senior internasionale rugby.
Die Springbokgroep sluit 18 spelers met toets-ervaring in. Die enigste twee spelers in die beginspan wat nog nie hul toetsdebuut gemaak het nie, is die Junior Bok-kaptein Riley Norton (slot) en die stut Carlü Sadie. Onder die plaasvervangers sonder toets-ervaring is JJ Kotze (haker), Paul de Villiers (losvoorspeler) en die SA o. 20-losskakel Vusi Moyo.
Stick het ook ’n talentvolle jong SA ‘A’-span aangekondig, ondersteun deur ervare spelers soos Lukhanyo Am, Boan Venter, Phepsi Buthelezi, Vincent Tshituka en Neethling Fouché.
Luan Giliomee, Jaco Williams en Zekhethelo Siyaya vorm die agterste drietal, terwyl Markus Muller saam met Am in die middelveld speel. Yaqeen Ahmed en Haashim Pead sal die spel as skakelpaar beheer.
“Ek sien uit daarna om te sien waartoe hierdie groep spelers in staat is teen ’n vasberade Zimbabwe-span wat reeds vir die Rugbywêreldbeker in 2027 gekwalifiseer het,” het Stick gesê.
“Die jong spelers en diegene sonder internasionale ervaring het uitstekend ingeskakel die afgelope week, en daar is duidelike opgewondenheid om op die veld te kom.
“Hierdie wedstryd bied waardevolle blootstelling aan senior internasionale rugby vir hulle én vir Zimbabwe. Dit gee die afrigters ook die geleentheid om ons diepte te beoordeel terwyl ons nie net vir hierdie seisoen voorberei nie, maar ook met die oog op die Rugbywêreldbeker in 2027.”