Beide jihadistegroepe, sowel as die Maliese weermag en sy Russiese bondgenote, het sedert die grootskaalse aanvalle in April wat die land se regerende militêre junta geskud het, ernstige menseregteskendings teen burgerlikes gepleeg, het Human Rights Watch gesê.
Die gekoördineerde offensief in April deur Al-Kaïda-verwante jihadiste en Toeareg-separatiste het strategiese dorpe geteiken en die land se invloedryke minister van verdediging gedood. Daarna het die jihadiste ‘n blokkade op die hoofstad, Bamako, ingestel.
“Namate die gevegte weer opvlam, pleeg die strydende partye in Mali opnuut ernstige menseregteskendings teen burgerlikes en herhaal hulle vorige patrone van geweld teen die burgerlike bevolking,” het Ilaria Allegrozzi, senior Sahel-navorser by Human Rights Watch, in ‘n verslag gesê wat AFP Maandag gesien het.
Die Al-Kaïda-verwante Groep vir die Ondersteuning van Islam en Moslems (JNIM) en geallieerde Toeareg-vegters het op 25 April grootskaalse aanvalle op die Maliese weermag en Africa Corps, sy Russiese bondgenoot, in die noordelike stede Gao en Kidal uitgevoer.
Volgens Human Rights Watch is 13 burgerlikes in dié aanvalle dood en minstens 25 beseer.
Tussen 6 en 21 Mei het JNIM meer as 40 burgerlike voertuie wat op pad na Bamako was, aan die brand gesteek.
In die noordelike dorp Tonka het die jihadiste ook ‘n man in die openbaar tereggestel.
Die Maliese weermag het intussen, volgens die verslag, “misbruikende teenopstand-operasies teen Fulani-gemeenskappe in sentrale Mali” uitgevoer, waartydens 38 burgerlikes, insluitend 23 kinders, dood is.
Die weermag het ook na bewering twee hommeltuigaanvalle uitgevoer:
- Op 25 April in die sentrale dorp Guimbe, waar 12 kinders en tieners dood is.
- Op 17 Mei in Tene, waar 10 mans en vroue dood is terwyl inwoners vir ‘n troue bymekaargekom het.
“Al die partye het burgerlikes onwettig aangeval, en sommige het hul huise en winkels vernietig en geplunder,” lui die verslag.
Vir die verslag het Human Rights Watch tussen 26 April en 9 Junie 34 mense op afstand ondervra, waaronder 30 ooggetuies van die beweerde misbruik, asook lede van die burgerlike samelewing, gemeenskapsleiers en joernaliste.
Volgens Human Rights Watch het Mali se minister van justisie nie gereageer op ‘n skriftelike versoek om kommentaar nie.
JNIM het reeds sedert September brandstoftenkwa-konvooie wat na Bamako onderweg was, aangeval, wat die hoofstad tydens die hoogtepunt van die krisis in Oktober feitlik tot stilstand gebring het.
Sedert 2012 worstel Mali met ‘n veiligheidskrisis weens aanvalle deur jihadistiese groepe wat aan Al-Kaïda en die Islamitiese Staat (IS) verbind word, asook gemeenskapsgebaseerde gewapende groepe en separatiste.