Sestien jaar. Vyf Spele. 21 medaljes. Een absolute legende.
Chad le Clos het die beste vir laaste gelos en eers in die laaste wedren van die Statebondspele vanjaar sy plek in die sportgeskiedenis verseker. Toe Suid-Afrika se 4×100 m-aflosspan Woensdagaand in Glasgow se Tollcross Internasionale Swemsentrum derde in die gemengde wisselslag gekom het, het die ikoniese 34-jarige ’n medalje en ’n plek in die rekordboeke losgeswem.
Dit was medalje nommer 21. Nie net in swem nie. Nie net vir Suid-Afrika nie. Dit is die meeste Statebondspele-medaljes wat enige atleet, in enige sport, in die Spele se 96-jarige geskiedenis gewen het.
As daar ooit ’n sprokieseinde was, is dit dié een.
Die reis het op 4 Oktober 2010 begin toe hy goud in die 200 m-vlinderslag in Delhi gewen het. Byna 16 jaar later in Glasgow kon hy sy naam in die geskiedenisboeke skryf.
Die syfers vertel die storie
SA se swemmers het ’n uitstekende week beleef en Glasgow met 22 medaljes verlaat – ses goud, sewe silwer en nege brons.
Le Clos se 21 medaljes oortref die vorige rekord wat hy met die Australiese swemster Emma McKeon gedeel het. Dit laat ook die prestasies van die legendariese skutte Phil Adams en Mick Gault, wat elk 18 medaljes gewen het, in die truspieëltjie.
Le Clos het drie medaljes in Glasgow gewen – almal in aflosnommers – en daarmee stelselmatig elke mylpaal verbygesteek. Eers het hy Adams en Gault verbygesteek, toe McKeon op 20 medaljes geëwenaar en uiteindelik, in die laaste item van die swemprogram, alleen bo uitgekom.
Die mees emosionele aand
“Vanaand was emosioneel,” het Le Clos ná die medaljeseremonie gesê. “Maar ek dink daardie eerste twee medaljes was net ’n bietjie meer spesiaal, omdat ek daardie mylpaal moes oorkom. Vanaand moes ek net kalm bly en hopelik die werk klaarmaak.”
Hy het onthul dat Dinsdagaand se afloseindstryd – waaraan hy nie eens deelgeneem het nie – vir hom die mees emosionele oomblik van die Spele was.
“Die manier waarop die seuns en meisies geswem het, hulle het alles gegee. Hulle het heeltyd gesê: ‘Nalatingskap’, ons doen dit vir Chad voordat hulle uitgestap het. Dit beteken die wêreld vir my.”
Dit sê alles oor Le Clos se ingesteldheid. Met 21 Statebondspele-medaljes op sy kerfstok was die oomblik wat hom die diepste geraak het nie sy eie wedren nie, maar om te sien hoe sy spanmaats vir hom swem.