Die enkelbesering wat Sacha Feinberg-Mngomezulu opgedoen het in die Stormers se 44-21 oorwinning oor Cardiff in ’n Verenigde Rugbykampioenskap-kwarteindstryd Saterdag, sal hom vir drie maande op die krukkelys hou.
Dit volgens ’n berig van News24, wat sê Feinberg-Mngomezulu het ’n hoë enkelverstuiting, bekend as ’n sindesmose-besering, opgedoen. Sindesmose is die artikulasie waarby die aangrensende oppervlakke van bene met bindweefsel verbind is.
Die talentvolle losskakel is beseer terwyl hy ’n drie gedruk het in die Stormers se oorwinning, en sy afwesigheid is ’n groot terugslag vir John Dobson se span, wat die moeilike taak het om na Ierland te reis om Leinster in ’n halfeindstryd hierdie naweek te pak.
Dit is ook ’n terugslag vir die Springbokke, aangesien Feinberg-Mngomezulu die wedstryde teen Engeland, Skotland en Wallis in Julie sal misloop.
Daar sal vrae wees oor of hy fiks sal wees vir die Rugby’s Greatest Rivalry“-reeks teen die All Blacks, met die eerste toets wat vir 22 Augustus geskeduleer is. Met die voorspelling oor die besering, lyk dit of hy dalk eers gedurende die reeks sal terugkeer.
Feinberg-Mngomezulu het Sondag op sosiale media reageer, en sy frustrasie oor die besering in hierdie stadium was tasbaar.
“Gewoonlik plaas ek carousels sonder onderskrifte. Hierdie keer gaan ek dit sê soos dit is. Gefrustreerd, geïrriteerd, en wonder hoekom ek?” het hy gesê.
“Soms herinner die spel jou daaraan dat jy nie invincible is nie!
“Nog ’n besering, nog ’n kans om honger terug te kom, vasberade en gefokus. Ek het ’n werk om te doen: Om terug te kom en dit beter as voorheen.