Die Valke in Mpumalanga het die skuldigbevinding verwelkom van ’n voormalige Eskom-werknemer en drie medebeskuldigdes, asook drie maatskappye, in ’n komplekse bedrog- en geldwasseryskema waarin Eskom vir sowat R8,5 miljoen benadeel is.
Die Middelburgse Gespesialiseerde Handelsmisdaadhof het Dinsdag al die beskuldigdes skuldig bevind. Die saak spruit uit die bedrieglike toekenning van tenders tussen Oktober 2016 en Mei 2019.
Die individue is Nozipho Ntuli (39), wat as ’n aankoper in die verkrygingsafdeling by Eskom se Duvha-kragstasie gewerk het, Thulani Harries Mahlalela (43), Edward George Sekatane (46) en Alfred Lebogang Sekatane (62).
Die maatskappye is Phoenix Motion Enterprise, Hustle Hard Development en Itireleng Masheleng.
Die Sekatanes is verbind aan twee van die maatskappye, naamlik Phoenix Motion Enterprise en Itireleng Masheleng, terwyl Mahlalela die direkteur van Hustle Hard Development was.
Die maatskappye het soos volg by Eskom gebaat:
- Phoenix Motion Enterprise: R5 380 646,00
- Hustle Hard Development: R2 231 380,00
- Itireleng Masheleng: R913 712,00
Totaal: R8 525 738,00.
Die beskuldigdes sal op 19 Oktober tydens vonnisopleggingsverrigtinge uitvind wat hul lot is.