Die Organisasie teen Belastingmisbruik (Outa) het ’n dringende aansoek by die hooggeregshof ingedien om fase 2 van die Aarto-stelsel te stop. Outa voer aan die regering het die stelsel in werking gestel voordat die onafhanklike appèlmeganisme, waarop motoriste geregtig is, ingestel is.
Outa wil hê die hooggeregshof moet fase 2 van die Administratiewe Beregting van die Padverkeersoortredingswet (Aarto) opskort totdat die regering die vereiste wetlike beskermingsmaatreëls in plek gestel het.
Die burgerregte-organisasie voer aan dat die regering die gewysigde verkeershandhawingstelsel op 1 Julie in 62 munisipaliteite geaktiveer het sonder belangrike beskermingsmaatreëls, insluitend ’n onafhanklike Appèltribunaal wat motoriste nodig het om administratiewe besluite te betwis.
Outa se dringende aansoek volg op wetgewing wat op 29 Junie gepubliseer is om die gewysigde Aarto-wet in werking te stel, met die Aarto-regulasies wat ’n dag later gepubliseer is.
Advokaat Stefanie Fick, Outa se uitvoerende direkteur vir aanspreeklikheid, het gesê die organisasie steun strenger padveiligheidsmaatreëls, maar nie ten koste van behoorlike regsproses nie.
“Wat ons nie kan aanvaar nie, is dat die regering ’n nuwe wetlike stelsel afdwing voordat die beskermingsmaatreëls wat deur daardie stelsel belowe word, in plek is. Die regering verwag van motoriste om die wet na te kom. Hy moet bereid wees om aan dieselfde standaard te voldoen,” het Fick gesê.