“Teleurgesteld.” Dit was Rassie Erasmus se onmiddellike reaksie nadat hy gehoor het dat die Junior Bok-stut Kai Pratt positief getoets het vir ’n verbode middel.
Die toets is tydens die o. 20-Rugbykampioenskap in April geneem, terwyl Pratt die huidige o. 20-Wêreldkampioenskap in Georgië weens ’n besering misloop.
Erasmus het Maandag, ná die aankondiging van die Springbokspan vir die wedstryd teen Wallis, aan joernaliste gesê hy is teleurgesteld oor die nuus.
“Teleurgesteld, in ongeloof. Ek bedoel, hy het ’n blink toekoms voor hom,” het Erasmus gesê.
“Hy was nie deel van ons groep toe dit gebeur het nie, daarom weet ek nie regtig wat ek kan sê om ’n positiewe nadraai daaraan te gee nie.
“Dit is nie lekker nie. Ek hoop die proses word behoorlik afgehandel en dat daar dalk ’n fout was of iets dergeliks, maar ek het niks meer om daaroor te sê nie.”
Pratt bly intussen onderhewig aan die proses om vir verbode middels te toets, met die uiteindelike uitslag wat sal afhang van die ontleding van die B-monster en enige daaropvolgende dissiplinêre verrigtinge.
- Kry al jou rugbynuus in Die Papier, op NovaNews en op KickOff.com.