Owerhede in Rusland se Novosibirsk-streek het inwoners aangemoedig om van die huis af te werk en reise per motor te beperk te midde van ‘n toenemende brandstofkrisis wat deur Oekraïense aanvalle op olieraffinaderye veroorsaak is.
Die streek, met bykans drie miljoen inwoners, is een van die grootste in Siberië wat bevolking betref en ‘n belangrike ekonomiese en nywerheidsentrum.
Die aankondiging volg nadat Oekraïne vroeër die week ‘n olieraffinadery in die naburige Omsk-streek aangeval het en een van Rusland se grootste olieverwerkingsaanlegte buite werking gestel het.
Volgens plaaslike mediaberigte en amptenare ervaar meer as 90 persent van Rusland se streke sedert Junie brandstoftekorte. Sommige streke het reeds rantsoenering by vulstasies ingestel en die vul van brandstofkanne verbied.
In ‘n besluit wat Woensdag gedateer is, maar Vrydag deur Russiese media gepubliseer is, het die Novosibirsk-streeksregering werkgewers aanbeveel om personeel van die huis af te laat werk en brandstofverbruik te verminder.
Die regering het inwoners ook aangeraai om reise met privaat voertuie binne die Novosibirsk-streek en daarbuite te beperk totdat die verhoogde staat van paraatheid opgehef word.
Owerhede in die naburige Tomsk-streek het ook afstandswerk aangemoedig en regeringsamptenare versoek om sakereise te heroorweeg en vergaderings aanlyn te hou. Die stad Irkoetsk, verder oos, het eweneens aanbeveel dat werknemers van die huis af werk.
Oekraïne teiken sedert die begin van die oorlog, wat reeds vier en ‘n half jaar duur, gereeld Rusland se olie- en gasinfrastruktuur. Volgens Kiëf is dié aanvalle ‘n geregverdigde vergelding vir Rusland se aanvalle op Oekraïense burgerlikes.
Die Russiese president, Vladimir Poetin, het erken dat daar brandstoftekorte is, maar gesê dit is “nie kritiek nie” en Kiëf daarvan beskuldig dat hy verdeeldheid in die Russiese samelewing probeer saai.