’n Verdagte wat na bewering betrokke is by multimiljoenrand-tenderbedrog by die Tembisa-hospitaal, is by OR Tambo Internasionale Lughawe in hegtenis geneem nadat hy uit die buiteland teruggekeer het.
Die 37-jarige verdagte is Vrydag 28 Augustus in hegtenis geneem. Die arrestasie vorm deel van die Valke se ernstige korrupsieondersoek om te verseker dat diegene wat by die Tembisa-hospitaal-sage betrokke is, tot verantwoording geroep word, het Valke-woordvoerder kolonel Katlego Mogale gesê.
Die bewerings in hierdie Tembisa-hospitaalsake hou verband met bedrog, korrupsie, vervalsing en/of die aanbieding van vervalste dokumente, oortredings van die Wet op Openbare Finansiële Bestuur en geldwassery.
Daar word beweer dat sekere amptenare by die hospitaal met diensverskaffers saamgesweer het om die versoek-om-kwotasie-stelsel vir verkrygingstransaksies onder die R500 000-drempel uit te buit. Dié benadering is doelbewus gebruik om die formele tenderproses te omseil.
Die verdagte sal na verwagting Maandag 31 Augustus in die Gespesialiseerde Handelsmisdaadhof, wat in die Palm Ridge-landdroshof sit, verskyn op aanklagte wat verband hou met bedrog, korrupsie en geldwassery.