Hugo Broos se manne móét teen Tsjeggië presteer, anders kan hul Wêreldbeker-droom verby wees nog voor dit werklik begin het.
Bafana Bafana pak Donderdagaand vir Tsjeggië in ’n alles-of-niks-wedstryd in die Atlanta-stadion, met die afskop om 18:00 Suid-Afrikaanse tyd. Die Safa het dit as ’n “reuse kragmeting” beskryf ná die teleurstellende 0-2 openingsnederlaag teen mede-gasheer Mexiko.
Die somme is eenvoudig genadeloos: Indien Bafana nie vandag al drie punte inpalm nie, sal dit geweldige druk plaas op die laaste groepwedstryd teen die gevaarlike Suid-Korea en kan hul hoop om die uitklopwedstryde soos mis voor die son verdwyn.
Broos sal dié belangrike wedstryd moet aanpak sonder die invloedryke middelveldspeler Themba Zwane, wat ’n skorsing van drie wedstryde opgelê is ná sy rooi kaart in die nederlaag teen Mexiko verlede Donderdag. Dit is ’n groot terugslag vir Bafana se kreatiwiteit en dryfkrag in die middelveld.
KickOff.com bied egter ’n sprankie hoop. Suid-Afrika se Wêreldbeker-rekord teen Europese lande staan op twee oorwinnings, twee nederlae en een gelykopuitslag, allesbehalwe rampspoedig. Bafana het Denemarke in 1998 gelykop gehou, Slovenië in 2002 met 1-0 geklop en Frankryk in 2010 op tuisbodem met 2-1 verslaan. Die nederlae teen Frankryk (1998) en Spanje (2002) is steeds seer, maar die algehele rekord toon dat Bafana hul man kan staan teen Europese teenstanders wanneer die druk die hoogste is.
Nog meer bemoedigend is dat Bafana nog nooit teen Tsjeggië verloor het nie. Hul enigste vorige ontmoeting was tydens die Konfederasiebeker-toernooi in 1997 in Riyad, waar die spanne met 2-2 gelykop gespeel het. Brendan Augustine en die huidige hulpafrigter Helman Mkhalele het vir Suid-Afrika aangeteken, terwyl Vladimír Šmicer twee doele vir die Tsjegge behaal het.
Ten spyte van dié geskiedkundige statistiek, word Tsjeggië as gunstelinge beskou. Die toernooi het egter reeds verskeie verrassings opgelewer, met Australië en Ivoorkus wat die verwagtinge oortref het deur hul openingswedstryde te wen.
Bafana-ondersteuners in Atlanta is aangemoedig om deel te neem aan ’n feesoptog voor die wedstryd vanaf Founders Green na die stadion, met regstreekse musiek, kos en verversings. “Bring julle vlae, trek julle truie aan en maak daardie stembande warm. Kom ons wys Atlanta hoe Suid-Afrikaners hul span ondersteun,” het die span op sosiale media gesê.