Polisie in die Noord-Kaap het twee verdagtes in hegtenis geneem en vermoedelike tik ter waarde van R50 000 gekonfiskeer ná ’n hoëspoedjaagtog in Kenhardt.
Lede van die Kenhardt-polisiekantoor was omstreeks 19:00 op Vrydag 3 Julie besig met misdaadvoorkomingspatrollies toe hulle ’n voertuig op die buitewyke van die dorp opmerk wat vermoedelik vir dwelmverspreiding gebruik is, luidens ’n polisieverklaring.
Toe beamptes probeer het om die Renault Megane te stop terwyl dit die dorp binnegekom het, het die bestuurder weggejaag, wat tot ’n agtervolging deur wetstoepassers gelei het.
Waaksaam tydens die agtervolging
Gedurende die hoëspoedjaagtog het polisie opgemerk hoe die passasier voorwerpe by die voertuig se venster uitgooi.
Toe die voertuig uiteindelik tot stilstand kom, het die manlike bestuurder probeer om te voet te vlug en glo nog items weggegooi voordat hy aangekeer is.
Met die hulp van bykomende polisielede is beide verdagtes in hegtenis geneem.
Polisie het vermoedelike tik met ’n beraamde straatwaarde van R50 000, kontant wat vermoedelik die opbrengs van misdadige bedrywighede is, asook die voertuig gekonfiskeer.
’n Man (41) en ’n vrou (23) is op dwelmverwante aanklagte in hegtenis geneem en sal na verwagting binnekort in die hof verskyn.
Die ZF Mgcawu-distrikskommissaris, genl.maj. Sebili, het die polisielede geloof vir hul waaksaamheid en vinnige optrede. Sy het gesê die stryd teen dwelmverwante misdaad bly ’n prioriteit vir die polisie.