‘n Egpaar is Vrydagaand (24 Julie) ernstig beseer nadat hulle na bewering tydens ‘n gewapende huisroof op ‘n plaas naby Stellenbosch aangeval is.
Die Wes-Kaapse polisie het bevestig dat die Stellenbosch-polisie ‘n saak van huisroof met verswarende omstandighede ondersoek ná die voorval wat omstreeks 21:00 plaasgevind het.
Kaptein Frederick van Wyk, woordvoerder van die Wes-Kaapse polisie, het gesê die huiseienaars, ‘n man en ‘n vrou, is deur drie onbekende verdagtes gekonfronteer.
“Die Stellenbosch-polisie ondersoek ‘n saak van huisroof met verswarende omstandighede ná ‘n voorval wat Vrydag, 24 Julie 2026, omstreeks 21:00 op ‘n plaas naby Stellenbosch plaasgevind het. Volgens berigte is die slagoffers (die huiseienaars), ‘n man en ‘n vrou, deur drie onbekende manlike verdagtes oorval.”
Volgens Van Wyk het die verdagtes die slagoffers met koevoete aangerand, waarna hulle die sleutels van hul kluis geëis en hul vuurwapens gesteel het.
“Die verdagtes het daarna van die toneel gevlug en die egpaar ernstig beseer agtergelaat. Die slagoffers is na ‘n nabygeleë mediese fasiliteit geneem vir behandeling,” het Van Wyk bygevoeg.
Hy het verder gesê die rowers het klapmusse gedra en in ‘n wit Toyota Corolla gery.
Plaaslike paramedikus Kurt Maske het die voorval ook bevestig. Hy het gesê die verdagtes was gewapen en dat die aanval die inwoners ernstig beseer het, veral die man. Volgens Maske het die verdagtes vuurwapens en verskeie ander items gesteel voordat hulle van die toneel gevlug het.
Van Wyk het gesê die ondersoek duur voort en dat niemand nog in hegtenis geneem is nie.
“Enigiemand met inligting wat die polisie met die ondersoek kan help, word versoek om Crime Stop by 08600 10111 te skakel of die MySAPS-toep te gebruik om anoniem ‘n verslag te doen,” het hy gesê.
‘n Golf van huisrooftogte het die afgelope paar maande die Helderberg- en Boland-gebiede getref.