Die Verenigde Rugbykampioenskap (vRK) vir die 2026/27-seisoen skop binnekort af. Stormers-afrigter John Dobson se span het herbou en herlaai met ’n duidelike doel, en die Kaapse ondersteuners het alle rede om te glo dat dié groep saamgestel is om trofeë te wen.
Groot name vir die Streeptruie Salmaan Moerat, Ruben van Heerden, Dan du Plessis en Suleiman Hartzenberg, wat laasgenoemde by die Sharks aansluit vir ’n wyle, is van die opvallende afwesiges by DHL-stadion hierdie seisoen.
Maar vir ’n rugbyunie met die Stormers se diepte en ambisie is dit bloot ’n hindernis op die pad en nie ’n doodloopstraat nie.
Projek 2029 kry sy sterspelers
Die terugkeer van Siya Kolisi, Wilco Louw en Cheslin Kolbe is geen toeval nie. Dit vorm die hart van die Stormers se ambisieuse Projek 2029-inisiatief. Kolisi het in Julie vanaf die Sharks teruggekeer en bring onskatbare leierskap sowel as ’n magdom Springbok-ervaring saam.
Louw, ’n kragstasie op vaskopstut, voeg nóg meer staal by ’n skrum wat reeds een van die mees gevreesde in die VRK was. En dan is daar Kolbe, die man wat Kaapstad in 2017 as ’n opkomende ster verlaat het en nou as wêreldkampioen terugkeer, nege jaar wyser en meer honger as ooit tevore.
Saam met spelers soos Sacha Feinberg-Mngomezulu, Cobus Reinach, Ntuthuko Mchunu en Damian Willemse lyk dit na ’n groep wat in staat is om weer die beker eindelik huis toe kan bring.
Kolbe praat reguit
Kolbe (32) het tydens die Greatest Rivalry-reeks teen die All Blacks op die Brendan Nel-YouTube-kanaal openhartig oor sy terugkeer gepraat.
“Ek is beslis opgewonde om terug te wees in Kaapstad waar alles vir my begin het. Die besluit was eenvoudig. My vrou en kinders was in Kaapstad terwyl ek in Japan was. Dit was moeilik om van hulle af weg te wees, en ek het gevoel die tyd is reg om huis toe te kom.
“Om weer ’n geleentheid by die Stormers te kry, maak my ongelooflik dankbaar, want daar is tans soveel uitstekende jong spelers in die groep.”
Sy loopbaanpad deur Toulouse, Toulon en Tokyo Suntory Sungoliath is iets wat hy koester, maar die trekkrag van die huis het nooit verdwyn nie.
Hy was ewe eerlik oor waarom dit aanvanklik nodig was om oorsee te gaan speel.
“Elke speler het ’n doel en wil in verskillende kompetisies en ligas speel, en Japan was beslis een van die plekke wat ek wou ervaar. Om daar te kon speel, was uniek en besonders op sy eie manier. Maar dit was moeilik om weg van my vrou en kinders te wees en die klein oomblikke in hul lewens mis te loop.”
Skok op die grootste verhoog
Kolbe se terugkeer huis toe is egter ietwat uitgestel weens besering. Hy het sy kakebeen in die derde toets teen die All Blacks by FNB-stadion gebreek. Die Springbokke het die wedstryd met 29-24 gewen om ’n voorsprong van 2-1 in die reeks te neem, maar Kolbe staar nou ’n paar weke langs die veld in die gesig.
Die Stormers se openings-VRK-tuiswedstryde, insluitend die watertand-derby teen die Sharks op 10 Oktober, sal dus sonder hom moet voortgaan.