Jaco Williams (vleuel), Vusi Moyo (losskakel), Ruben van Heerden (slot) en Carlü Sadie (stut) sal almal hul toetsbuiging maak wanneer die Springbokke Saterdag in Durban teen Wallis in hul derde Nasieskampioenskap-wedstryd uitdraf. Dit is deel van ’n sterk span wat deur die nasionale afrigter, Rassie Erasmus, aangekondig is.
Erasmus het ’n goeie balans gevind deur ’n mededingende span te kies, terwyl hy sy belofte gestand doen om elke speler in sy uitgebreide groep ’n geleentheid te gee om hulself op die hoogste vlak te bewys. Die wedstrydgroep sluit ook André-Hugo Venter (haker) en Herschel Jantjies (skrumskakel) op die plaasvervangersbank in.
Moyo en Williams sal die eer hê om hul toetsdebuut op hul tuisveld van die Sharks te maak, saam met die voorspelers Van Heerden, wat die Stormers vir Frankryk verruil het, en Sadie, wat vir die Europese Kampioenebeker-wenners Bordeaux Bègles speel.
Venter sal sy tweede toets speel indien hy van die bank af opgestuur word, nadat hy in 2024 teen Portugal sy buiging gemaak het. Jantjies het laas in 2023 teen Argentinië die groen-en-goud oor sy kop getrek.
Eben Etzebeth (slot), Franco Mostert (veelsydige voorspeler), André Esterhuizen (senter en flank), Canan Moodie (veelsydige agterspeler), Handré Pollard (losskakel) en Ox Nche (stut) was nie vir keuring beskikbaar nie aangesien hulle steeds van beserings herstel.
Moyo sal die spel vanaf losskakel beheer saam met die ervare skrumskakel Cobus Reinach, terwyl Williams saam met Kurt-Lee Arendse en heelagter Aphelele Fassi ’n opwindende agterste drietal vorm. Damian de Allende en Jesse Kriel sal die middelveld beman.
Voor sal Sadie saam met Gerhard Steenekamp en Malcolm Marx in die voorry uitdraf, met Van Heerden en Cobus Wiese in die tweede ry. Paul de Villiers, Pieter-Steph du Toit, wat weer kaptein sal wees, en Jasper Wiese vorm die losvoorspelers.
Erasmus het vyf voorspelers en drie agterspelers op die plaasvervangersbank gekies. Venter, Jan-Hendrik Wessels en Wilco Louw sal die plaasvervanger-voorry vorm, terwyl Ben-Jason Dixon en Marco van Staden onderskeidelik dekking vir slot en ’n losvoorspeler sal bied.