Meer klem moet beslis op die swak werkprestasie van onkundige kaderontplooiing van staatslui val.
Dissiplinêre sake word met opset en tot frustrasie van almal so kompleks moontlik voorgehou. Tegniese punte in beleid en prosedures word dae lank tot vervelens toe uitgerafel – wat afhandeling van die saak ontspoor. So beskerm kaders onbevoegdheid en die prosesse herhaal hulself.
Intussen ontspan onbevoegde aangeklaagde beamptes by die huis en kry salarisse, terwyl die hardwerkendes al die werk afhandel. Ná maande keer geskorstes terug en ontvang dan boonop bonusse en verhogings.
Die hardwerkende werkers raak gefrustreerd en verloor hul passie om te presteer.
’n Toksiese werkomgewing is die gevolg. Die afwesigheidstatistieke verhoog. En so volg krisisbestuur, swak besluitneming en swak dienslewering.
Navorsing het bewys dat die middelbestuurvlak nie oor die kundigheid beskik om werknemers tot hul volle potensiaal te ontwikkel nie.
Nog meer, om gevolgebestuur toe te pas. Werkgewers moet alle beleide en prosedures benut en die sabotasie van doeltreffende gevolgebestuur monitor om wanpraktyke bloot te lê.
- Dr. Richard Harding, Sinoville