Passasiers aan boord van die passasierskip MV Hondius, waar ’n seldsame en dodelike hantavirus-uitbreking reeds drie lewens geëis het, word nou onder streng veiligheidsmaatreëls van die skip ontruim nadat dit Sondag die Spaanse eiland Tenerife bereik het.
Gesondheidsowerhede het begin om passasiers een vir een te evalueer voordat hulle onder streng beheer na hul onderskeie lande teruggestuur word. Geen gewone kommersiële vlugte word gebruik nie, en verskeie lande het reeds spesiale moniterings- en kwarantynplanne ingestel.
Die Nederlandse skip het sedert Maart deur die Suid-Atlantiese Oseaan gevaar nadat dit vanuit Ushuaia in Argentinië vertrek het.
Volgens die Europese Sentrum vir Siektebeheer (ECDC) word alle passasiers tans as “hoë-risiko kontakte” behandel totdat verdere toetse afgehandel is.
Amerikaanse passasiers sal volgens berigte na ’n spesiale kwarantynfasiliteit in Nebraska geneem word voordat hulle huis toe mag gaan. Britse, Nederlandse en ander internasionale passasiers sal ook vir weke ná hul terugkeer gemonitor word.
Die uitbreking het wêreldwyd kommer laat ontstaan nadat sowat 30 passasiers vroeër op Saint Helena van die skip afgeklim het voordat die volle omvang van die situasie bekend was. Gesondheidsowerhede probeer nou kontakte in verskeie lande opspoor.
Die Wêreldgesondheidsorganisasie (WGO) het bevestig dat minstens ses gevalle reeds bevestig is, terwyl nog twee vermoedelik met die virus verbind word.
Kenners beklemtoon egter dat die risiko vir ’n wêreldwye uitbreking tans laag bly. Volgens die WGO vereis oordrag van die Andes-stam gewoonlik “noue en langdurige kontak”.
Die eerste geval aan boord is vermoedelik reeds vroeg in April aangemeld. ’n Nederlandse man het later op die skip gesterf. Sy vrou is kort daarna tydens ’n mediese ontruiming in Johannesburg dood. ’n Duitse passasier is later ook oorlede.
LEES OOK | Só lyk die wedloop om vir hantavirus op ’n passasierskip te toets
Die WGO sê daar is tans geen tekens van ’n groter epidemie nie. “Die risiko vir die breër publiek bly laag,” het die organisasie gesê.
Kenners probeer steeds bepaal hoe die virus aan boord versprei het. Daar word vermoed dat sommige passasiers moontlik reeds tydens uitstappies in Argentinië blootgestel is voordat die skip vertrek het.
Die hantavirus word gewoonlik deur kontak met knaagdiere of hul urine en mis versprei. Simptome sluit koors, spierpyn, naarheid en ernstige asemhalingsprobleme in. In ernstige gevalle kan dit tot orgaanversaking en die dood lei.